تاخد جنية بلم عوني هشام

تاخد جنيه
======= عونى هشام
تقايضنى رغيف
وتاخد فكه
انا اصلى جعان 
ومليش سكه
طب اعمل ايه
حالى على ادى
وهفرقع
لو بس بتكه

الفكه يا دوبك
على ادى
حنيهات ومخصمانى
ما تدى
مافى بينا عمار
ليل ويا نهار
وان جاتنى
اوام بتاخد سكه

زمان اهو عدى
خلاص او فات
والجِنِى اهو ماشى
معايا شحات
القيمه بتاعته
فى النازل
وانا نازل
الم معاه فى فتات

دا جنيهنا زمان
كان له قيمه
كنت اَكل
وادخل بيه السيما
ومعايا فكه
للب وفشار
دا مكانش هزار
وابن لئيمه

دلوقتى خلاص
ملهوش قيمه
وعنينا تملى
عليها غيمه
ماشيين نتخبط ونخبط
اهو بعنا البيت
دلوقتى
ساكنين فى الخيمه

عنوانه ورسمه
على الكبريت
دا جنيه اليوم
زى العفريت
يدخل جيبك
يطلع يجرى
وبشوف منه
كدا جنب الحيط

اهو قاعد
يشحت ويايا
ويزود
فى الهم اسايا
اشحت واديله
عشان يكبر
يكبر فى كروش
واكله غدايا

وانا لسه
بقايض برغيفى
اكراه والله
ماهو بكيفى
طب اعمل ايه
حد يقول لى
ومفيش فكه واخرى بتكه
وهفرقع منكوا فى السكه
==========
#عونى_هشام