مش اخونا ولا ابننا بقلم عوني هشام

مش اخونا ولا ابننا
=========== عونى هشام
فينا من ولادها
مش اخونا ولا ابننا
عايش فوق ترابها
وتايه وسطنا

ماشى بالنميمه
نفسه ناكل بعضنا
يبان انه حبيب
وعميل لعدونا

ارحل يا ابنى ارحل
شغلك ما يهزنا
نايم فى الجحور
وتنهش عرضنا

فينا من ولادها
مش اخونا ولا ابننا

فينا ابن عاصى
وكفر بعضنا
يعمل المعاصى
ويبيع فى دمنا

طب ليه تاكل فى خيرها
وتنكر فضلها
قتلت ابنى الشهيد
كان بيحرس ظلها

رملت فى الارامل
ويتمت طفلها
بفعلك الخسيس
هانزيد فى عزمها

فينا من ولادها
مش اخونا ولا ابننا

هنكبر المصانع
ونزرع ارضها
هنبنى طوبه طوبه
ونعلى فى اسمها

مع داعش ع الحدود
بتحمى عدونا
ملعون ابو الجدود
روح غور من عندنا

اياك فاكرها عزبه
هيصدك ابنها
تكونش مال ابوك
وهتوزع رزقها

فينا من ولادها
مش اخونا ولا ابننا

فوق يابنى دا بعدك
دا الرزق لربنا
راضيين باقل عيشه
وايمانا ف قلبنا

يا عزيزة انتى العزيزة
بنحبك كلنا
وان كان فى ابن عاصى
اكيد مش مننا

رب العزة صانك
وحماكى جندنا
عظيمه بنور ايمانك
وساكنه قلبنا

فينا من ولادها
مش اخونا ولا ابننا
==========
#عونى_هشام