من المسئول بقلم هشام عوني

من المسئول
======== عونى هشام
بشوف صوركم اتألم
كان نفسى يوم مره اتعلم
تيجى مصيبه دواها كلام
التانيه تيحى وتعلم
وكله اصله كان امبارح
لو كان شجر عمره ما طارح
ترويه وترجع تلعب فيه
ملهاش مكان او فى مطارح
حتى البحر غضبان على طول
موجه عالى تقولشى دا غول
برخصه تركب او من غير
عشان ضمير من غير مفعول
فى ناس كتير اوى فيه ماتت
لا فى حراك والكون ساكت
الغرب شافوا وفضحونا
والدمعه فى العين اهى باتت
لا عارفه تدخل او تخرج
ع الحال دا انا مش لاقى مخرج
ياما قلنا وحذرنا
وكتير يقول دا سؤال محرج
نفسى واحد مره يقول
بشجاعه انا فيكم مسئول
الكرسى ده اكبر منى
هاتوا انتوا واحد اد القول
معقوله ده ممكن يحصل
لازم قرار حازم يفصل
ساعتها ممكن نتقدم
ونجمع الحبل ونوصل
الحكومه ما فيها وصال
والشعب ماشى يتخبط
قرارات ما فيها اى حبال
ولازفى عزيمه هناك تربط
على الفساد فاسد مسئول
يمكن تروح تلاقيه مخبول
يقول شمال ويروح ليمين
ماشفته مره قام معدول
تيجى المصيبه ويطنش
فى الحل تلاقيه بيطفش
ويغش نفسه قبل الناس
ويقول ما بعرفش اغشش
لامتى ع الحال ده ياعالم
نفسى مسئول فيه عالِم
عالم بحالنا واحوالنا
ما يكونش جاهل فيه ظالم
نفسى
=========
#عونى_هشام