عبد المعين
مشوار طويل مشيته وحدي
من ميلادي لحد لحدي
والميلاد يبدأ بصرخة
صرخة طالعة في صدري شارخة
نحتة إسمي في الوجود
بصرخة الطفل البرئ
إبتديت أمشي الطريق
بشرط مااتعدى الحدود
والحدود شط الحريق
والحريق فيه الخلود
قلت آخد ياناس صديق
يكونلي في الطريق رفيق
والطريق بحر الحياة
فيه إللي عام فيه الغريق
فيه إللي معاه طوق النجاة
يحميه من موج بحر الحريق
والصديق كانلي الشيطان
في زي تعبان ألعوبان
زينلي كل المعاصي
وسوسلي ولفلفلي راسي
كتفني بحبل الغواية
بعت أهلي وبعت ناسي
كانت هى دي البداية
لإنكساري وإنتكاسي
رميت كل الحلال ورايا
وبالحرام مليت في كاسي
شربت منه ماأكتفيت
شربته كله ماإرتويت
قلت يابو زيد ياريت
ماغزيت لما إغتويت
أسلمت وجهي للإله
بدمعة الندم بكيت
دعيت يارب أنا إبتليت
بنفس هاجرة دينها فاجرة
وبفجورها أنا إرتضيت
عين يارب العزة عين
عين عبدك عبد المعين
بقلم طارق لاالسيد
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور