لسه//سيد عبدالوهاب

لسه
وفَات عَلِينا عَام
ولسّه بِينّا كلام
ولسّه عايش فِينا
ناس بِتبَات حزَينه
وناس أَصلاً نِيَام
وناس غلَبها الألم
خَلاّها الفقر عدَم
عايشه الحياه إعدَام
ناس طَالبه مزَاج
وناس عاوزَه عِلاَج
عارف عِلاجهَا بكَام !
وناس تطلُب رِغِيف
عايشه على الرصِيف
راقدِين عليه إكوَام
ولسّه فِيه أطفال
ماشیه بدون نِعال
شايفه نهارها ظلام
لسّه أحلام برِيئه
عَاوزِينها تكُون حقيقه
نِمشى بِيها ل قُدّام
ولسّه فيه أمانى
عاوزه تِرجع تانى
ولسّه فيه أحلام
ولسه فينا ناس
ناسيه حرُوف إسمها
وناس تِبِيع جِسمها
وبتشترى أوهام
ولسّه فينا عيوب
وناس تِملى الجيوب
وناس رابطه الحِزام
ولسّه فينا قلب
بيدُّق دايماً ذَنب
يعشق كِلمة حرَام
وجَاى عام جِديد
يدُوب لِسّه ولِيد
نُوره شَقّ الأرحَام
أملنَا فِيه كِبِير
يخلق تانى خِير
بُكره نشُوف الأيّام
سيد عبدالوهاب