البِلياتشو
بُص تعالى شُوف واتفرّج
بِلياتشُو بارقُص وأهرّج
دارس كل فنون الصبر
من جامعة حُزنى متخرّج
دايماً كِدا غَلْبانى ظروفى
أدهن وشّى وادارى كسُوفى
علشان ألقَى لُقمة حلال
أطعم بِيها ياناس جُوفى
أجرى بسرعه كدا واتشقلب
أضحك يامَا واعمل مقلب
جايز أعجب ناس بايخه
جايز احقّق ليهم مَطلب
لازم صوت الضحكه يسمّع
ممنوع حد يشوفنى بدَمّع
لازم أكتم ألمى وجرحى
وامشى اتمختر كِدا واتقمّع
بالبس تُوب بِالحُزن اتخيّط
من جُوايّا اصرخ وأعيّط
لكن لمّا الناس بتشُوفنى
لازم أضحك قوى وأزَيّط
بارسم جُوّا قلوبهم ضحكه
باتحَمّل ناس غِلسة وتِنكة
علشان أخر يومى ألاقى
جُوّا جيوبى شوية فَكة
عمرى باجرح إنسان طيّب
عمرى مابشتم كدا وأعيّب
عمرى ما بانطق كلمة لأ
دايما بانطق حاضر طيّب
عمرى مابسرق حتى فلوس
عمرى مابكسر أى نفوس
عمرى ماقُلت انا حظّى شوية
ولا بَسأل أنا لِيه منحوس
راضى ب حالى وباشكر ربى
بادعى لكل الناس من قلبى
عاوز بس ف لحظة وجعى
ألقى إنسان واقف جنبى
..........
سيد عبدالوهاب
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور