عطشان ياصبايا
عطشان ياصبايا دلوني على السبيل
عطشان وغلبت أنادي
فى الوادي وفى البوادي
راح ذادي مع ذوادي
وفضلت لوحدي ذليل
عطشان ياصبايا دلوني على السبيل
ياصبايا رُدوا عليا
وبلوا فى ريقي شوية
مبقاش غيركم ليا
تدلوني على السبيل
عطشان ياصبايا دلوني على السبيل
جاوبوني ورًدوا عليا
واستعذبوا دمع عنيا
مش داريين ليه بما بيا
وصفولي الدمع بديل
عطشان ياصبايا دلوني على السبيل
قلت اشرب من عيني
دموع يمكن ترويني
حلفت دمعتي ماتجيني
إلا أما أشوف الويل
عطشان ياصبايا دلوني على السبيل
قالوا ياعطشان غالبك
الشوق المالي فى قلبك
يامسكين ماشي في دربك
دربك مافوهش سبيل
عطشان ياصبايا دلوني على السبيل
أنا كنت السقا زمان
أروي بإيدي العطشان
أصبحت أنا الغلبان
بحلم بالسلسبيل
بقلم طارق السيد
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور