(( غنيلى ))
صوتك غناوى وفى
قمر ونجوم وضى .
وصبية حلوة بجد
عيونها صباح بسام
تقولش لوحة غزل
مرسومة بايد رسام .
غنيلى ..
و خلى الأمل يطرح
فى عيون المسا حواديت
وتبقى عنيكى ونس
بيبدد الوحشة
ويغرد النهاوند
يطوى الغناوى طى ..
غني كمان مرة
كورد وبيات ومقام
من صوتك المخملى
أجمل حوار وكلام .
يجى النهار يفرح
من رقة الأنغام .
وانت يا بت كمان
صوتك اهو أجمل
أجمل متين مرة
من ألف ناى وكمان ..
حتى ملوك بابل
بيفكروا تانى
يزخرفو جنينة
لعيونك الحلوة
مبنية ع الأحلام ..
غنى كمان مرة
وانا اوعدك بكرة
أوصى الملك رمسيس
ينقل لك الأهرام ..
بس احذرى جدا .
تسمعنا حتشبسوت
الست دى غيورة
تشبه اخوها (توت )
تفتن ملوك سومر
يجوا يسرقو كحلك
ويقولو الولد مصرى
ولا يسمحولى افوت .
وانتى اكيد عارفة
ما اقدرش اغيب عنك
ولو غبتى يوم عنى
اكيد ده يبقى الموت ..
غنيلى ما تخافى
يا زورقى الغالى
يرسى على ضفافى ..
يبقى فرات ونيل
الاتنين نبع واحد
وشهدهم صافى ..
خللى العذول يغار
يسهر بطول الليل
يشكى أسى وهموم
وانت نغم وسنان
يشبه وتر غافى ..
يا احلى قصة عشق
واجمل قصيدة شعر
من ألف سطر وسطر
مكتوبة بالأقلام
منطوقة بشفافى .....
بقلمى محمد على العبيدى
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور