انا مصرى
========== عونى هشام
انا واقف فى شارع سد
يوم الجمعه فى الجامع
واروح مع حنا يوم الحد
انا مصرى وهتعرفنى
بخفة دم فوق الحد
ظروفى اقابلها بالنكته
وهمى ازيحه بالضحكه
فرحى بسيط اوى جدا
ووقت الشده واقف جد
تعالى نمشى فى الشارع
يكون فعلنا مضارع
لا نتعارك لا نتصارع
ولا نبنى ما بينا سد
في ازمه ؟ كلنا عارفين
في محنه ؟ كلنا عايشين
طريقنا قول واخدنا لفين
تعال ندعى ونقول يارب
نسيجنا ودمنا واحد
إلاهنا وربنا واحد
ماضينا م الازل واحد
وقول راجع لسابع جد
نعالج روحنا بايدينا
واحمد يبقى اخو مينا
بيجمعنا هدف واحد
مايفصل بينا سور او سد
يوم الجمعه فى الجامع
واروح مع حنا يوم الحد
كتاب الله بيمينى
اقول قراَن يهدينى
واروح مع مينا فى القداس
باحساس حب فاق الحد
تشوفنا فى الشبه واحد
مفيش بينا ولا جاحد
بناخد بعض بالاحضان
ونطبع بوسه فوق الخد
انا مصرى
============
#عونى_هشام
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور