الدرهم:// عمر بنحيدي

الدرهم:

قالواللي عندو الدرهم

ماعندو هم .

جاوبتهم:" عندي الدراهم
وحتى الهم بالعرارم. "(١)
قالو لي :"أنت دمدومة(٢)
ما تعرف تصرف ف الكرمومة(g).(٣)
بالدرهم تزول الهم
وتقتل الحساد بالسم (٤)
وتكون بو لكتاف والشلاغم
تصير حاج ،استاذ و دكتور
انت بطل و الفيلم عليك يدور
الناس يعطيوك قيمة
تصبح نجم سيما
تولي عندك هيبة السبع
عالم وفقيه ولو ما شاف ، ماسمع.
والمرا تصير لالة مولاتي
الحاجة ولالة خيتي
مولات الري والشوار
النوارة و عمارة الدار
جميلة الجميلات ف الدوار
تنهي وتامر بلا اي اعتبار .
بالدرهم البعبد يقرب
والمعنزز بوه يتأدب"".
سمعو ياناس
سمعو الصح،سمعو الساس
كلام المجدوب
ما فيه كدوب:
""الكلام اللي سمعتو غالط ومغلوط
ديال شي واحد جاهل ومزلوط
والزلطة ماشي غير ف الجيب
الزلطة الصعيبة ف العقل والقليب
المحبة اللي تجي بالمال زايلة
كيف الظل تابع الكايلة (g )(٥)
الصحاب والحباب يتبلحسو (٦)
الى مابقى ف الطجين ما يلحسو
كلها يتكا على بلغتو و .يتفرتكو
الركبة الى خوات
والصحة الى مشات
المال ما يرجع اللي فات
اوالقلب الى برد
و مولاه تجبد و تمدد
الدرهم ليه الحياة ما يرد
وللسعادة ما يوجد
السعادة تحقق بالعبادة
وبحب الناس يا سادة ""
* * * * *
شرح بعض الكلمات:
١: العرارم : أي أكوام ،جمع كومة.
٢: دمدومة: ساذج
٣:كرمومة: ثروة مالية
٤: بالسم: اي حسدا
٥: الكايلة( g): اي الشمس الحارة.
٦: يتبلحسوا: يمدحون نفاقا ورياء.
د
عمر بنحيدي 26/3/2018