لحني الحزين
*****************
لحني الحزين اتعزف
وانا لسه ف اللفه
والجرح مني نزف
دار الزمان..... لفه
والزفه دايره البلد
فرحانه ف المجروح
شمتانه ف اللي اتولد
والحلم فيه مدبوح
والروح ....تسلم روح
طرح الألم... والنوح
وانا اللي حلمي اتوأد
وخسرته ف الرفه
من صغري تاه مركبي
وتاه معاه حالي
وبغني مع موكبي
عن حالي موالي
وف دمعي شطي غرق
وشراعي و الدفه
وانا الوحيد بردان
قبل الأوان بأوان
واقف كما الشجعان
وأقدامي ع الحافه
وعشان ...ما أنا الانسان
عايش زمان حيران
فيه الأمان اختفي
ومن الجفا.... إتوفي
يا شمس ..يا مروحه
عدي........ علي دارنا
مسي لي ع المطرحه
والقمح........ف شوالنا
نور الصباح . طراح
لون الأمل .........أفراح
والارض...... لسه براح
والفرحه ........ف القفه
*************************
رضا أبو الغيط
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور