عقلى فين == عونى هشام

عقلى فين
=========== عونى هشام
كل افكارى تاهت منى
وتهت معاها
سألتها مره بعدت عنى
نسيتها خلاص

رحت اعيد مع نفسى الكَره
سهرت الليل وخرجت لبره
فضلت افكر دى من ايه
ما عرفت اساس
يمكن حاله بمر معاها
لو فى منكم عاش وياها
يقول لى دواها
ولا انا عايش بالوسواس
اصل بشوف احوال مغلوطه
ساعات بوصفها بكيلو الاوطه
عشان مجنونه
وشدت بعض عقول الناس
مثلا مثلا
ناس بتحب تعيش بالعيبه
وتوهم روحها انها لاعيبه
لا فيها زمه او اخلاص
تشوفه تقول دا امام الجامع
عايز اسمه دايما لامع
بتشوف فعله عكس كلامه
ويعد علينا الانفاس
عيبنا زمانا والعيب فينا
توهنا اليوم ونسينا ماضينا
نشوف الدنيا هيا الدنيا
ليه اتغير فيها الناس
تشوف الطالب راح مدرسته
ماشى يتمخطر ماشى على راحته
لا البيت شايفه لا حد يحاسبه
وداخل الفصل بدون كراس
وياما كتير احوال مقلوبه
ناس كسبانه وناس مغلوبه
والمغلوب كان صاحب الحق
ضاع الحق باى اساس
وياما سرحت مع افكارى
سهرت الليل ووصلته نهارى
ليه الناس بتحب الباطل
ليه الحق نسيبه ينداس
عايزين ثوره جوه نفوسنا
نفسى ضميرنا يعود ويبوسنا
مانلاقى واسطه مانشوف رشوه
ويبقى الحب هو اساس
يد بيد بدون ارهاب
مسلم قبطى اكيد احباب
نبنى بلدنا نحمى وطنا
بهمه وعزم وكل حماس
نبنى بلدنا نحمى وطنا
بهمه وعزم وكل حماس
===========
عونى هشام