*****{ #سعد_الله_مسا_خلّي }*****
.
.
سعد الله مسا خلي
الحاضر واللى داخلي
الليلة حقول كلام واعر
لا حيبقى ولا يخلي
لأن صورتى ف بطاقتى
شايلة هم فوق طاقتى
حلفت ابعد عن الدُنيا
وابص عليها من طاقتى
ولا مرة بناخد منها
ودموعنا ع الخدود منها
بتقسى علينا ما تدينا
برغم ان احنا خدمينها
تعالوا نشوف حكايتنا
إن كان ف الشغل أو بيتنا
بنمسك بس ف الدُنيا
مع إن الدُنيا سابتنا
مفيش ولا شئ بيعجبنا
وبنبخل باللى فى جيبنا
بنطاطى للى ذاللنا
ويودى فينا ويجيبنا
شيطانا ف كل شئ طامع
وبننسى ان ربنا سامع
بنقتل بعض ف الملعب
وبنسرق بعض ف الجامع
ف أكل السُحط حريفة
وبننهب كل تعريفة
بطلنا نلجأ لحُكّمْ اللّه
وبنلجأ بس للفيفا
لو فينا إيمانا متحكم
ما حيقدر يذلنا حاكم
لا يجى يوم نقول الآه
ولا نتذل ف محاكم
ف عشان قلوبنا تكون صُحبة
نرجع لرسولنا و للصُحبة
ولو نفذنا كلام الله
حنبقى ورد ف الصحبة
نفسى الحب يدفى قلوبنا
نفسى الصدق يطهر توبنا
عشان يرضىَ المولى علينا
ويغفر لينا كل ذنوبنا
*
*
*
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور