هديه لحبيبتي/ بقلم /عادل ابوزيد

هديه لحبيبتي....... بالعاميه
وهاحكي عنها للي يحبها
واللي ماكانش يحبها
واللي مايعرفهاش
دي كات بتمشي
بتنور
قلوب الناس
واحلامهم
ولما تعدي قدامهم
بتبهرهم
وتسحرهم بسحر عجيب
ولما تغيب
كأن الشمس وياها
كمان بتغيب
ولا كان فيها أبدا عيب
غير الضحكه اللي
مافارقتش شفايفها
وكان كل اللي شايفها
مفكرها بتضحكله
أبو شكله
وأقول يابنتي
خفي الضحكه دي شويه
تقوللي ليه؟
أقول بتولع الدنيه
وتضحك هيه
وتسيبني ف نار تانيه
ماتدركهاش
يابت الضحكه مش ببلاش
دي ناس بتشوفها
وعد أكيد
وناس بتشوف معاها العيد
وناس تفكيرها كله شمال
بتفهمها على البطال
فخفي الضحكه دي شويه
وماتعانديش
ويمكن كات بتتضايق
وماتقوليش
وتفضل هي
زي ما هي
أجمل حاجه
في عمري
وأجمل عمر كان ينعاش
وهاحكي عنها
للي يحبها
واللي ماكانش يحبها
واللي مايعرفهاش
بقلم عادل ابوزيد