يا ويلي ياويل/بقلم /السيدابوطاحون

يا ويلي ياويل
***********
يعني العيال
المجرمين دول
يا امي
شاربين نفس اللبن
متوضيين في النيل
وسمعوا صوت
رفعت و عبد الباسط
و مصطفى اسماعيل
واتنفسوا نفس
الهواءالعليل ..
اللي يرد الروح ؟

وقف الكلام مدبوح
يا دمنا المسفوح
ساعة الصلا لله
لسه السؤال مطروح
يعنى العيال
المجرمين دول
يا أمي
عاشقين ترابك
واقفين على بابك
بطول الليل
وبيحرسوا القناديل
وبيعشقوا المواويل ؟
يا ويلي .. يا ويل
يا ويلي .. يا ويل
************
ولا انتي
في الضلمه كنتي
بترضعي في الديب
وتنزلي المشاريب
للي ما له
في المحبه نصيب
والجوع بياكل
قلب كل حبيب
خايفه من المطاريد
والمحاسيب
و اللي في عز زنقتك
تركك في حضن الديب
واللي اشتغل جراح
من غير ما يبقى طبيب
واللي حفظ كلمتين
واتسمى راجل دين
وافتى للمساكين
وهام في حب الدولار
واللي قبض ع النهار
وسلمه لليل
يا ويلي .. يا ويل
يا ويلي .. يا ويل
**************
فجرت ليه الكنيسه
و خلعت عين العروسه
يا حمار ف راسه جاموسة
مين علمك الدين
واخدت مين الدليل
يا ويلي .. يا ويل
يا وليلى .. يا ويل
*************
يعني انت دين القتل
أنت اللي قاتل هابيل
ورميت اخوك في البير
وأنت قتلت الحسين
و حاولت تقتل ناصر
وأنت ربيب الخوارج
فجرت ليه الكنيسه
يا بو التاريخ اسود
وما تخافيش يالكنيسه
نامي في حضن المسجد
وانتو يا اهل الكنيسه
وصى عليكم محمد
وأنت الجهول بالدين
وأنا البرئ منك
مين علمك الدين
وأخذت مين الدليل
يا ويلي .. يا ويل
يا ويلي .. يا ويل
************** #ياويلي_ياويل #الاخنوم #السيدابوطاحون