مربعات من الالف الى الياء
============= عونى هشام
أ.....
اشواقك اشوفها بعينى
واشواقى ليه بتداريها
بتخبى عنى تاجينى
مشاعرك قلبى داريها
ب....
بقول كلامى بقلبى
يرد قلبك اَهات
معرفش عنك. اخبى
وشايفك بكل. الجهات
ت....
تبعدنى عنك وترجع
اسامحك وانسى اللى فات
فكرى. عملته. مرجع
وقلبى فيه الذكريات
ث....
ثناءك عليا. فى حبك
يسعدنى. واقول. كمان
افرح معاك وف قربك
اغنى. واعزف. كمان
ج....
جمالك بيزيد. دلالك
واحس بيك من بعيد
لو دهب الدنيا. قبالك
اختارك واكون. سعيد
ح....
حبيبى قرب قبالى
حياتى. تحلا. معاك
شغلت فكرى وبالى
وقلبى فيه مبتغاك
خ....
خايف تقرب اجيلك
معايا لك ذكريات
انا بعمرك وجيلك
وبينا. ياما حكايات
د....
داريت عنى جراحك
الجرح جوايا زاد
اياك تفارق براحك
دا اللقمه. تكفينا. زاد
ذ....
ذهبت عنى ونسيتنى
وتسيبنى اعيش بالعذاب
انادى. وانت ما جيتنى
دا عقلى م الفكر ذاب
ر....
راهنت عليك بعمرى
وعارف. انك ملاك
فى سمايا. انت قمرى
وغيرك ما يملك ما لاك
ز....
زرعت قلبى بورودك
والشوك. مالوهش مكان
حياتى نور بوجودك
يشغلنى. غيرك ما كان
س....
سهران. اعد النجوم
وانت شاغل لى بالى
ماعرفت لحظه انى اقوم
شايفك بعينى قبالى
ش....
شفت نور عيونك
طفيت انا شموعى
تخونى ما اخونك
واخفيها فى ضلوعى
ص....
صبرت ياما كتير
وشربت كاس المر
الجرح. عندى. كبير
وياما جراح بتمر
ض....
ضربت ليك الودع
وفتحت يومها. الكف
ماشفت. غير البدع
وكأنى مضروب. كف
ط....
طريقك مشيته معاك
فى طريقى كنت. وحيد
معرفش مين دعاك
خاف ظنى. يبقى اكيد
ظ....
ظنونى لسه ظنون
والفكر راح لبعيد
لو صدقت. يبقى جنون
وان خلفت هابقى سعيد
ع....
عايز اقول لك بحبك
وخايف إن قلبك يفوتنى
عزابى. عشته ف قربك
فى بعدك انت نسيتنى
غ....
غالى عليا ومالك الروح
حتى الجرح دواه وياك
سرى ف قلبك اوعى تبوح
قريته ف عينك يوم رؤياك
ف....
فاكر كنت بقولك ايه
وانت معايا. من كام يوم
سرى كشفته قلت عليه
خلا افكارى سحاب وغيوم
ق....
قلت كلامى ماسمعتوش
ياما وياما كتير فكرتك
شفت بعينى اللى ماشفتوش
اوعى تقول انى ماحذرتك
ك....
كتبت الشعر حروف وابيات
بس الحبر كان مغشوش
رحت كتبته على الايبات
سرقوه منى طلعت فشوش
ل....
لسه كلامنا معاكوا كتير
انتوا نجوم والسهره هاتحلا
صحبه كبيره. وفيها. الخير
م الافشات طبعا ما بتخلا
م....
منى عشانكم الف سلام
والف تحيه كمان لعيونكم
عمر الحب ماكان بكلام
ايد مع ايد والمولى يعينكم
ن....
نظره بنظره سحرنى جمالها
طيفها فى بالى خدته دليل
خطوه بخطوه مشت بدلالها
سرحت معاها سهرت الليل
ه....
هنت عليها وهيا ما هانت
قالت انا دورى كان تمثيل
هيا قالتها ودموعى سالت
وحسيت راسى كمان بتميل
و....
وجدت خيالها فى ركن بعيد
رحت بشوق مع بعض عتاب
ليه بتغيبى بدون مواعيد
سألتك مره. ماجانى جواب
ى....
ياريتنى ما رحت هناك ولا جيت
ياريتنى قفلت وراهاه الباب
ندمت حقيقى ان انا حبيت
بدرت الحب جنيته عذاب
==================
#عونى_هشام
ليست هناك تعليقات:
إرسال تعليق
شكراً لكم مع تحياتنا القلبية بعبق الزهور